أبومسلم يعلق على أداء الأهلي أمام توروب ويكشف أسباب غياب الهوية

أحمد أبومسلم، نجم الأهلي السابق، انتقد أداء الفريق في الفترة الحالية، وأكد إنه فيه نقص واضح في الثبات والهوية تحت قيادة المدرب ييس توروب.

وقال أبومسلم، خلال برنامج «نمبر وان» مع الإعلامي محمد شبانة على قناة “cbc”، إن ضم المهاجم كامويش محير، لأنه لو كان لاعب مؤثر في ناديه، كان صعب يتخلى عنه في يناير، لأن الأندية الأوروبية بتدفع فيه أرقام كبيرة.

وأضاف أبومسلم إن تكوين كامويش الجسماني ضعيف، وده بيأثر عليه في الالتحامات، خصوصًا في المباريات القوية.

وفي نفس السياق، تناول أزمة الظهير الأيسر، وأكد إنها مستمرة منذ غياب علي معلول، وقال: “مفيش حل حقيقي للأزمة دي، والأهلي لسه مش قادر يلاقي البديل المناسب”

كما انتقد غياب الشكل الفني للفريق، مشيرًا إلى عدم وضوح طريقة اللعب، وقال: “مش قادر أفهم شكل الأهلي مع توروب، وكمان تدوير الحراس بين مصطفى شوبير ومحمد الشناوي مش منطقي، لأن ده المركز الوحيد اللي مش ينفع فيه تدوير”

وأشاد أبومسلم بفريق البنك الأهلي، وقال إنه عنده حلول فنية مميزة، بينما الأهلي ظهر تائه في الشوط الأول، وكان الأفضل وجود لاعب ارتكاز صريح بجانب زميله لتحقيق التوازن.

كما انتقد عدم ثبات التشكيل، وقال: “توروب مش ثابت على تشكيل، وده غلط، لأنه من أهم صفات المدرب الناجح إنه يكون عنده تشكيل ثابت، ولحد دلوقتي مفيش أي لاعب تطور مستواه”

وأكد إنه أليو ديانج ما ينفعش يقعد على الدكة، وأشار إن إشراك أحمد عيد كان لازم يتعمل تدريجيًا، بدل من الدفع به في مباراة قوية، وده خلى مستواه يبان متواضع.

واختتم أبومسلم تصريحاته بالتأكيد على إن مركز حراسة المرمى ما ينفعش فيه تدوير، وقال: “دايمًا فيه حارس أساسي وحارس احتياطي، ومفيش حاجة اسمها تدوير في الحراسة، وده بيعكس شخصية المدرب، وتوروب واضح إنه واثق في مصطفى شوبير، لكنه كمان مش عايز يخسر محمد الشناوي”