في وقت حساس بالنسبة للنادي الأهلي، الإعلامي أحمد شوبير كشف عن تفاصيل مهمة تتعلق بالصفقات، وضغوط الجماهير، والأزمة المالية التي بيعيشها النادي، مؤكدًا أن الصورة المتداولة بعيدة عن الواقع داخل القلعة الحمراء.
قال شوبير خلال برنامجه الإذاعي: “مش فاهم إيه اللي بيحصل، كأن في حاجة مخفية أو هوس عند جماهير الأهلي بالمطالبة بالصفقات، وده يبدو وكأنه عفريت اسمه الصفقات، وأنا هتكلم بصراحة من غير ما أغضب حد”
وتابع: “للأسف، الإدارة بتستجيب لضغوط الجماهير، ولما الضغط يزيد، يبدأوا يفكروا في: احضر هذا، واحضر ذاك، رغم إنهم عارفين احتياجاتهم كويس، ومش محتاجين يتأثروا بالمواقع أو البرامج، هم عارفين بالظبط إيه اللي محتاجينه”
وأضاف: “الأمر بسيط، أنا بقعد مع المدير الفني، وهو بيقول لي إيه اللي محتاجينه، وبنبدأ نشتغل على الطلبات دي، مع فريق مختص، وكل الأمور بتتخطى مراحل كتيرة، رغم إنهم ممكن يجلسوا مع بعض ويحلوها في ليلة واحدة، لكن ده مش بيحصل”
واستكمل: “لو تعاقدت مع 6 صفقات في بداية الموسم و6 تانية في منتصفه، يبقى كأنك جبت 12 لاعب، طيب واللاعبين اللي نجحوا معاك قبل كده؟ الموضوع محتاج شوية منطق”
وأوضح شوبير: “هل في حد يشك إن الأهلي محتاج ظهير أيسر؟ لو يوسف بالعمري اتعاقد معه، يبقى كويس، لكن ليه لسه متم الإعلان عنه؟ لأن العدد الأجانب مكتمل، مش ممكن تعلن عن لاعب أجنبي من غير ما تستغني عن واحد تاني”
وأضاف: “إحنا كمان محتاجين مهاجمين، بس المشكلة الحقيقية هي المال، مش زي ما البعض متخيل إن أموال الأهلي متوفرة بلا حدود، الوضع مختلف، الأمور مش سهلة، زي واحد عايز يشتري عربية، الكل يتمنى الأغلى، لكن كل واحد بيشتري على قد إمكانياته”
واستطرد: “الأهلي مش عنده الفلوس اللي البعض متخيل، في مصاريف ضخمة وأحداث اليوم كتير، ومكافآت كبيرة، وفي نفس الوقت مصادر الدخل قلت، خصوصًا بعد عدم تحقيق دوري أبطال إفريقيا وعدم المشاركة في بطولة الإنتركونتيننتال”
وأشار: “بطولة دوري أبطال إفريقيا كانت تدر حوالي 4 ملايين دولار، وكمان الإنتركونتيننتال كانت هتدخل نفس المبلغ، يعني النادي خسر حوالي 8 ملايين دولار، وهو ما يعادل نص مليار جنيه مصري”
واختتم: “النادي شغال على ملف الرعايات والعضويات، لكن الأمور مش زي الأول، وأنا بشرح لكم معلومات مش هتسمعوها من مسؤولين النادي، لكن الحقيقة أن الوضع صعب”
التعليقات