محمد رائف، رئيس لجنة إدارة النادي الإسماعيلي، عبّر عن حزنه لما وصل إليه الفريق في الوقت الحالي، وأشار إلى أن هناك رجل أعمال واحد فقط يساعد النادي في أزمته الحالية.
رائف قال في تصريحات تليفزيونية عبر برنامج “الكابتن” مع أحمد حسن: “الظروف صعبة على الجميع، وكلنا حاسين بالهم قبل الجماهير، اللي بتعيش الإسماعيلي بكل تفاصيله ولها حقوق كبيرة على النادي، لكن المشكلة متراكمة من مجالس إدارات متعاقبة”
وتابع: “اللجنة السابقة مش مسؤولة عن اللي حصل، وقلنا في البداية إننا مش جايين عشان نبحث عن تمويل، جينا عشان نحاول نحل الأزمات ونلاقي حلول”
وأضاف: “اللي بيحصل في الملعب هو شغل اللاعبين والجهاز الفني، وتكلمت مع خالد جلال وقلنا هننافس لحد آخر الموسم، ومش هيكون في تأثير للظروف اللي بره الملعب”
رائف أشار إلى وجود حملة لجمع التبرعات لمساعدة النادي، وذكر إنه بيحسب التبرعات يوميًا، وهي أرقام بسيطة لكنها تعكس انتماء الجماهير.
وقال: “التبرعات بتبدأ من 5 جنيهات وأقصى مبلغ 1000 جنيه، وده بادرة طيبة نتمنى إنها تشجع رجال الأعمال في الإسماعيلية”
وأكمل: “في رجل أعمال واحد بس هو اللي ساعد النادي، وتبرع بمليوني جنيه بعد تعيين اللجنة الأولى للإسماعيلي”
وأضاف: “مستحقات الإسماعيلي لـ فيفا لازم تتسدد سواء كنا في الدوري أو القسم الثاني، والمبلغ الكلي 220 مليون جنيه مصري مرتبط بكرة القدم، بعيد عن أي مديونيات أخرى ممكن تتجدول”
وفي نهاية حديثه، أكد رائف إنهم ماشيين على 3 خطوات، الأولى هي تسويق النادي اجتماعياً، وبنستنى موافقة وزارة الشباب والرياضة، ومحددنا قطعتين في الإسماعيلية كطرح استثماري، ونسعى للحصول على قرض بـ 100 مليون جنيه من بنك، وكل الأمور متوقفة على موافقات الوزارة.