إبراهيم عادل، نجم الجزيرة الإماراتي والمعار لفريق نورشيلاند الدنماركي، ظهر بتصريحات جديدة عن طموحاته المستقبلية، وكشف عن جانب من حياته الشخصية ورأيه في جماهير الأهلي والزمالك.
قال إبراهيم عادل في حواره على قناة أون سبورت: “أنا نفسي أكمل في أوروبا، حاسس إني بتطور هناك، ولسة عندي أمل أحقق إنجازات أكبر، مش عاوز أرجع لمصر تاني، رغم إن في أوقات بحس بالحنين للعودة، لكن دلوقتي مش هيفيدني في مسيرتي”
وعن حياته الشخصية، تحدث إبراهيم عادل عن علاقته وزوجته بالقرآن الكريم، حيث قال: “أنا وزوجتي بنحاول نطور نفسنا في القرآن ونحفظ، إحنا هنا لهدف معين، وكل واحد هيتحاسب على أفعاله، لازم تركز على آخرتك وتراجع نفسك، بحب سورة البقرة والملك وبحس إن قراءتهم بتسهل عليا حاجات كتير”
في سؤال عن الجمهور الأقوى في الملعب بين جمهور الأهلي والزمالك، قال: “مش عارف بس من ناحية الضغط الجماهيري، جمهور الأهلي بيكون ضغطه أعلى، أما الزمالك فبيكون عندهم روح الدعابة”
تصريحات إبراهيم عادل بالكامل وحقيقة انتقاله إلى الأهلي
إبراهيم عادل طلع في الساعات الأخيرة في مؤشرات البحث بعد تصريحاته اللي أدلى بيها أمس، واللي وضح فيها موقفه من الانتقال للأهلي في الصيف الجاي.
الموقع “أحداث اليوم” هينشر تصريحات إبراهيم عادل بالكامل من حواره التلفزيوني أمس.
تصريحات إبراهيم عادل
“في الإمارات الناس محترمة، وكان انضمامي للجزيرة خطوة كويسة، ممكن حد يفكر إنها مش جيدة، لكن العكس صحيح، في يناير كنت مش عايز أكمل هناك، وحسيت إني عايز أطلع أوروبا، ومش عايز ألعب في الإمارات”.
“كنت عايز أطلع، وفي يناير سهلولي الموضوع، لكن في الوقت ده مكنش عندي عروض من أوروبا، العروض كانت في بداية الموسم، وبيراميدز والأهلي كلموني، والأهلي كلموني بعد بيراميدز لما حسوا إن الفرصة متاحة”.
“كنت خلاص مخلص كل حاجة مع بيراميدز، مع عمرو بسيوني اللي هو صديقي بره الملعب، وبحبه جداً وبتمنى له التوفيق”.
“بصراحة حسيت إني مش عايز أرجع، وكنت عايز أقول بعد كل ده هسيب كل حاجة وأرجع، وده مش هدفي أصلاً، وليه خرجت من الأول، لذلك حاربت على الذهاب لأوروبا”.